СІМ қазақ туристеріне өзбек полицейлерінің электрошокер қолданғанына қатысты пікір білдірді

25 мамыр 2022, 14:31

Қазақстан сыртқы істер министрлігінің ресми өкілі Айбек Смадияров Өзбекстанда қазақстандық туристердің жәбірленуіне қатысты мәлімдеме жасады, - деп хабарлайды Alashainasy.kz тілшісі "Қазақпарат"-қа сілтеме жасап.

Қазақстан сыртқы істер министрлігі не жағдай болғанын түсіну үшін хат жолдады. Біз азаматтарымыздың құқығын қорғаймыз", – деді Айбек Смадияров.

 

Оның айтуынша, министрлік Самарқан ішкі істер органдары қызметкерлерінің Қазақстан азаматтарына электрошокер қолданғаны туралы видеоны зерттеген.

 

"Өзбекстан қоғамы құқық қорғау органдарының бұл әрекетін сынап жатыр. Қалай дегенмен, біз жағдайды бақылап отырмыз", - деп мәлімдеді СІМ өкілі.

 

Оның айтуынша, Самарқан құқық қорғау органдарында қызметтік тексеріс басталған, туристерге электрошокер қолданған қызметкерлер жұмыстан шығарылған.

 

21 мамырға қараған түні Самарқанда күзет қызметінің өкілдері көрші елден келген туристердің кім екенін анықтау кезінде электрошокер қолданған.

 

Өзбекстан ішкі істер министрлігі заң бұзған қызметкерлер жауапқа тартылатынын мәлімдеді. Өзбекстан ақпарат құралдарының жазуынша, Қазақстаннан келген туристердің барлығында қажет құжаттар болған. Соған қарамастан полиция оларды ұстаған.