Ақтөбе – тоғыз жолдың торабында орналасқан қала. Халықаралық әуежайы бар. Облыс орталығынан шығатын автокөлік жолдары бұл өңірді Қазақстанның оңтүстігі, солтүстігі және Ресейдің Еділ жағалауындағы аймақтарымен байланыстырып жатыр. Оның үстіне, Қазақстанның батысы мен Еділ жағалауындағы халықтың төлем қабілеті жоғары, табысы да мол. Осы жай және Ақтөбе облысының қолайлы географиялық орналасуы мамандандырылған өнеркәсіптік терминалы бар «Ақтөбе» халықаралық сауда-логистика орталығының салынуына себепкер болып отыр. Бұл заманауи инфрақұрылым – Қазақстанның геоэкономикалық әлеуетін пайдаланудың ең бір тиімді жолы.

«Ақтөбедегі халықаралық сауда-логис­тика орталығының құрылысы биыл басталды. Жұмыс төрт кезеңмен жүзеге асы­рылуда. Жоба 2015 жылы толық қуа­тымен жұмыс жасай бастауы тиіс. Аса ірі инно­ва­циялық жоба жүзеге асса, Еуразия­дан тасылатын тауар нөпірі Қазақстан эко­но­микасы үшін мол табыс көзіне айналады», – дейді Ақтөбе әлеуметтік-кә­сіп­кер­лік корпорациясының басқарма төра­ғасы Серғазы Ханқожаұлы.

Сауда-логистика орталығының жалпы аумағы – 38 гектар. Оның 142 мың шаршы метрінде түрлі қоймалар орналасуы тиіс. Ал кеңселер мен қосалқы қажеттіліктер үш­ін 20 мың шаршы метр жер бөлінбекші. Бұл жобаға қатысуға Қытай, Түркия, Польша, Өзбекстан мен Голландия елдерінің кә­сіпкерлері осы бастан қызығушылық танытып отыр.

Аталмыш корпорация жүзеге асыр­мақ­шы аса ірі жоба туралы Серғазы Исембаев:

– Сауда-логистика кешені Қазақстан­ның батысындағы аймақаралық көтер­ме өнеркәсіптік кешен болғалы тұр. Ор­та­лықтың онсыз да мол мүмкіндігін құ­ра­мындағы жинақтаушы және шағын се­рия­лық тауар өндіруші кәсіпорындар арт­тыра түсуі тиіс. Халықаралық сауда-ло­гистика орталығы тәулігіне бес теміржол тарма­ғы­мен келетін 200-дей вагон ай­налымына қызмет көрсетуге қауқарлы. Күн сайын 320 контейнерді өңдеп, 270 ав­то­көлікті қабылдай алады. 1000 тоннадай жүк қа­был­­дайды. Сауда-логистика ор­талы­ғының құрылысы аяқталысымен, мұнда кедендік аймақ ұйымдастырылып, қо­нақ­үй кешені ашылады. Контейнер алаңы, сонымен қа­тар дербес газо­тур­биналық қуат беру стансысына арналған алаңқай салу да жоспарланып отыр, – дейді.

Жобаның мақсаты – «Батыс Еуропа–Ба­тыс Қытай» көлік дәлізінің бойында Ақтөбе арқылы өтетін жүк транзитін ұл­ғайту. Барлық мүдделі тараптар үшін бұл жерде тауар түрлерін ыдысқа құйып немесе салып орау, сонымен қатар тауар өндірісі мен тауар өңдеу секілді қызмет түрлері жүзеге асырылады. Яғни Ақтөбеге теміржол көлігімен жеткен тауар осында түсі­ріліп, қоймаға сақталды. Бірқатары осында саудаға шығарылып, бірқатары авто­көлікке тиеліп, түрлі маршруттарды бетке алады. Жергілікті халық үшін тағы бір тиім­ді тұсы – көкөніс пен жеміс-жидек құ­ны­ның тұрақты болатындығы. Себебі мұн­дағы қоймалардың мүмкіндігі мол. Және Ақтөбе облысының ауыл шаруа­шылығы өнімдері өзге өңірлерге делдалсыз саудаланады.

«Еліміздің көліктік инфрақұрылымын дамыту керек. Сол арқылы Қазақстан аз уақытта әлемдік көлік-коммуникация жү­йесінің маңызды бір бөлігіне айналады», – деген болатын Қазақстан Президенті Нұр­сұлтан Назарбаев. Осы сөздерді нақты іске айналдыруға бағытталған, аймақтың тасымалдық-көліктік инфрақұрылымын дамыта түсуге үлес қосатын «Ақтөбе» әлеу­меттік-кәсіпкерлік корпорациясының бұл бастамасына облыс әкімдігі көп қолдау көрсетіп отыр. Жоба Үдемелі индустриялық-инновациялық даму бағдарламасына енгізілген.