Абай ОМАРОВ (коллаж)

Тәуелсіздік – Қазақстан қоғамының өз мүмкіндіктері деңгейін түйсініп, ауқымды мақсаттарды шешкен кезеңі. Бұл кезеңді ұлттық жетістіктердің формуласы қалыптасқан уақыты деп айтсақ та болар. Ал ұлттық жетістіктердің формуласының негізінде, әрине, Елбасы Нұрсұлтан Назарбаев факторы тұр. Нұрсұлтан Назарбаевтың факторы дегеніміз – стратегиялық ойлау, саясаткердің ерекше тәжірибесі және ғаламдық мәселелерді шешу жолында Қазақстанды бәсекеге қабілеттіліктің жаңа сапалы деңгейіне шығару мүмкіндіктерін түйсіну. 20 жыл бұрын Нұрсұлтан Әбішұлы Назарбаевтың Қазақстанды қалыптастыру жолындағы мақсаттары жақын арада жүзеге асырылуы оңайға түспейтін асқақ арманға баланғаны рас. Ал қазір болса ол арман шындыққа айналды. Бүгінде Қазақстанды әлем елдері халықаралық аренадағы өз ұстанымы, бастамалары бар, ықпалды ел ретінде біледі.

Елбасының экономиканы жаңа жолға түсіру жолындағы қол жеткізген жетістіктері Қазақстанды мүлде жаңа деңгейге көтерді. Мысалы, 1993 жылы елдің жан басына шақ­­қандағы ЖІӨ 700 АҚШ долларын құ­раса, 2010 жылы 9000 АҚШ долларына же­тіп, 13 есеге ұлғайды. Биыл ол көрсеткіш 11 000 АҚШ долларын құрайды. Демек, өсім 15 есеге тең.

Елдің алтын-валюта қоры Тәуелсіздік жылдары 50 есеге артты. 1993 жылы 0,7 млрд АҚШ долларын құраса, 2011 жыл­дың қазан айында 32 млрд АҚШ дол­ларына жетті.

Тәуелсіздік жылдары Қазақстан эконо­микасына 136 млрд АҚШ долларынан астам инвестиция тартылды.

Қазақстан – стратегиялық жоспарлауды посткеңестік елдердің арасында ең тұңғыш рет енгізген мемлекет. Елбасы Нұрсұлтан Назарбаевтың басқаруындағы Қазақстан ешуақытта қиындықтарға мойыған емес. Әлем елдері дағдарыстан жапа шегіп жат­қан­да, Қазақстан 7 пайыздық өсімге қол жет­кізуге өз дайындығын көрсетуде. Ха­лық­аралық рейтинг агенттіктерінің Қазақ­стан­ның суверенді рейтингін көтеруі, біздің елді бизнес жасауға қолайлы ел ретінде қа­рас­тыруы мемлекеттің жеткен жетістік­те­рінен хабар берсе керек. Дағ­дарыстан ке­йінгі дамуда да ұлттық лидер, мықты мем­лекет пен әртараптан­дырылған эконо­мика аса маңызды факторлар бо­лады.

Біздің Тәуелсіздік алғаннан кейінгі жүріп өткен даңғылымыз ерекше. Біздің мақтанатындай жетістіктеріміз жетерлік. Бірақ біз өткен деңгейде қалып қоймай, сәтті «қазақстандық жолдың» әрі қарай жетіле түсуі үшін егемендігіміздің баянды болуы мақсатында Елбасы – Ұлт лидері Нұрсұлтан Әбішұлы Назарбаевпен бірге болашақтың көкжиегіне көз саламыз. Ал халқымыз үшін осынша қыруар қайрат жұмсап, аяғына жаңа тұрған жас мемлекетті жасампаз ету жолындағы бар қиындық­тарды еңсерген Нұрсұлтан Әбішұлын еліміз Тәуелсіздіктің Бас эко­но­мисі ретінде де танитыны дау­сыз.



Қайрат Келімбетов, ҚР экономикалық даму және сауда министрі