Келер жыл қалай болар екен?

21 наурыз 2012, 12:36

Қазақтың төл мерекесі – жаңа жыл да келіп жетті. Қоян жылын шығарып салып, ұлу жылына аяқ бастық. Өткен жыл адамзат өмірінде есте қалатындай ірілі-ұсақты оқиғалар мен тосын жағдайлардан да тыс қалған жоқ. Енді алдағы жылы бізді не күтіп тұр? Ұлу жылы қазаққа жайлы бола ма екен? Бұл туралы еліміздің сәуегейлері төмендегіше болжам айтып отыр.
Назарбек ҚОЖАМСЕЙІТОВ, жұлдызшы:
Желтоқсанның 21-інде үлкен өзгеріс орын алмақ
– Бірден айтайын, осы жылдың ая­ғын­да, желтоқсан айының 21,22-сі күн­дері әлемде үлкен өзгерістер орын алайын деп тұр. Кейбіреулердің Мая күн­т­ізбесі бойынша әлемде ақырзаман орын алады деуі тегін емес. Ақырзаман демей-ақ қояйық, бірақ үлкен өзгеріс, табиғи құбылыстар болмақ. Мен мұны жіті зерттедім. Бұл туралы Құранда да ұғынықты жазылған. Қазір дүниежүзінің ғалымдары, астрологтар жер шарына үлкен ғарыштық дененің жылжып келе жатқанын жеткізуде. Құранда да жұма күні ақырзаман болады деп жазылған. Ал 21 желтоқсан жұма күніне тура келіп тұр. Негізі, ақырзаман адамзаттан мейі­рім кеткенде, ұлдары көгілдір болып, қыз­дары ашық-шашық жүргенде, бір діннің бірнеше ағымға бөлінген кезінде келеді делінген. Қазір осының барлығы келіп тұр. Бүгінде адамдардың мінезі өз­геріп, Алланы ұмытты. Енді осы тосын жағдайда табиғатқа зиян келтіргендер, адамға зұлымдық, қатыгездік жаса­ған­дар үлкен қиындыққа душар болмақ. Неше түрлі жол-көлік оқиғалары орын алып, апат болады. Бұдан шығудың жос­пары менде бар. Оны газет бетіне жария­лай алмаймын. Оны айтсам, халық ара­сын­да дүрбелең туындауы мүм­кін. Сон­дықтан мен мұны қалайда Мемлекет бас­шысына жеткізуім керек. Ал халыққа айта­рым, тек бір Аллаға сыйынып, содан ғана жәрдем тілеуі қажет. Біз Жаратушыға жа­мандықтан сыйынсақ, тосын апат­тар­дың болмауын тілесек, мұның арты жақ­сы болады.
Сондай-ақ маусым айының басында елімізде әлеуметтік шиеленістер орын алуы мүмкін. Сәуір айының 20,21,22-сі күндері Оңтүстік пен Солтүстікте қар жауып, күн суытады.
Бекмұрат СЫРЛЫБАЕВ, құмалақшы:
Егін бітік шығады...
– Биыл көктем кеш түсіп, жер ылғалды болып, егін бітік шығады. Жер еміп жүр­ген диқан-егіншілердің ырзық-несібесі мол болады. Алла қаласа, биылғы жыл қазаққа құт-бере­ке алып келеді. Күзге қарай Үкі­метте тағы да азын-аулақ ауыс-түйіс­тер болуы мүм­кін. Оңтүстік аймақтарымызда аздаған жер сілкіністері орын алады. Бірақ ке­лер жылдан айтарлықтай қауіп көріп тұр­ғаным жоқ. Адамдар бір Аллаға сыйы­нып, зұлымдық, қатыгездіктен ау­лақ болса, ешқандай тосын оқиға орын алмайды. Себебі Алла жақ­сы­лық­ты да, жа­мандықты да адамның пейіліне қарай береді. Егер біздің ниетіміз түзу болса, қиындық та білінбей өтеді. Сонымен қатар Оңтүстік пен Солтүстіктің кейбір өңірлерінде су тасқыны болуы ғажап емес.
Айсұлу ӘМЗЕЕВА, жауырыншы:
Биыл халықтың несібесі мол болады...
– Биыл су мол болып, жердің жаны жадырайды. Халық та берекелі өмір сүріп, түрлі әлеуметтік толқулардан, шие­леністерден аман болады. Биылғы жыл көпшілікке қолайлы, несібелі жыл бол­мақ. Жұртшылық өзінің әлеуметтік мәсе­ле­лерін қиындықсыз шешетін бола­ды. Жұқ­палы ауру келмейді, су тас­қындары орын ал­майды.