ҚАЗАҚСТАН ДА РЕСЕЙДІҢ ЖАСАҒАНЫН ҚАЙТАЛАУ КЕРЕК

20 сәуір 2021, 10:55

ЗАҢСЫЗ МИГРАНТТАРДЫ ДЕРЕУ ШЫҒАРУ КЕРЕК...

 

Қазақстан да осы жолы Ресейдің жасағанын қайталау керек сияқты. Атап айтқанда заңсыз мигранттарды елден жаппай шығаруды айтамын. Ресей 1,1 млн заңсыз мигрантты елінен шығарып жатыр. Оларды өз елдеріне алып кетуге 15-маусымға дейін уақыт берілген. Әйтпесе шекараны тарс жабамыз деп отыр.

 

Енді сөзсіз сол 1,1 млн мигранттың біразы, шамамен 200-250 мыңы, яғни 25% бізге келуі мүмкін. Оның ішінде 49 мың қазақстандық бар. Ал Ресейдегі заңсыз еңбек мигранттарының көбі Орталық Азия елдерінен ғой.

 

Енді Ресейге бармаса, біразы бізге ағылады. Біздегі заңсыз мигранттар Өзбекстан, Тәжікстан, Қырғызстаннан ғой. Сондықтан бізде заңсыз мигранттарды 1-маусымға дейін шығарып тастау керек деп ойлаймын. Ол қазір өте маңызды.

 

Біріншіден, әлемде пандемия. Барлық азаматтар вакцина алып жатыр. Заңсыз мигранттар ол процеске қатыса алмайтыны анық. Ал жүздеген мың заңсыз мигрант вакцина алудан тыс қалса, онда вирусты жеңу де қиын болады. Себебі олардың басым бөлігі құрылыс, бау-бақша саласында істейді.

 

Екіншіден, коронадағдарыс салдарынан әлемде экономикалық дағдарыс болып жатыр. Бізде де. Жұмыс орындары жабылуда. Әр жұмыс орны маңызды. Сондықтан Қазақстан азаматтары жұмыспен қамтылу үшін заңсыз мигранттарды шығару керек. Заңсыз мигранттар жұмыс тапшылығын жасайды, себебі нарықтағы бағаны түсіреді.

 

Үшіншіден, ұлттық қауіпсіздік түсінігін ешкім алып тастаған жоқ. Заңсыз мигранттар арасында қылмыскер де, елінен қашып жүрген азаматтар да болуы мүмкін. Оны да ескерген жөн.

 

Төртіншіден, капитал ағымы сыртқа кетеді. Жылына миллиондаған, тіпті млрдтаған доллар.

 

Бір елден екінші елге барып жұмыс істеу тәжірибесі жаһандану уақытында арта береді. Қалыпты процесс. Бірақ заңды түрде жұмыс істеуге ғана рұқсат берген дұрыс. Еңбек визасын ал, келіп тіркел, келуші елге салығыңды төле де, алаңсыз жұмыс істе. Осы принцип екі жаққа да тиімді деп санаймын. Заңсыз мигрантты миллиондап кіргізген Еуропаны қараңыздар, біреудің жағдайына қарап, аяушылық танытатын заман емес.

 

ПыСы: Қазақстан Ресейден бұрын, 1-маусымға дейін заңсыз мигранттарды шығарып тастау керек деп ойлаймын.

 

 

 

 

Асхат Қасенғали

Фейсбуктегі парақшасынан