Төтенше жағдай

Құтқарушылардың қызметі ерлікпен тең!

  • Құтқарушылардың қызметі ерлікпен тең!

    Құтқарушылардың қызметі ерлікпен тең!

Төтенше жағдай қызметінің ішінде құтқарушылардың еңбегін ерекше атап өтуге болады. Олар кез келген жағдайда халықты төтенше жағдайдан құтқаруға дайын тұрады. Қызметі де сан салалы. Төтенше жағдай аймағындағы халыққа шұғыл медициналық және психологиялық көмек көрсету, төтенше жағдай аймағында және әскери іс-қимылдар жүргізу кезінде қоршаған ортаны қорғау, оларға тән қауіпті факторлардың әсерін оқшаулау және басу, төтенше жағдай кезінде ең алдымен халықты қорғау олардың негізгі қызметі саналады. 

Атап айта кетерлік жайт, көп жағдайда адамдардың қауіпсіздік ережесін сақтамауы төтенше жағдайға себеп болып жатады. Мәселен алматылық құтқарушылар жылына мыңнан астам шақыртуға барады екен. Жылына 600-ден астам адамды қауіпті аймақтардан құтқарып, 500-ден астам зардап шеккендерге алғашқы медициналық көмек көрсетеді екен. Құтқарушылар осынша мәрте қауіпке бастарын тіге отырып, басқалардың өміріне араша түседі. Олар бірде тау басында қалып кеткен немесе адасқан жандарды құтқарса, енді бірде суға кеткен жандарды құтқарады. Ал енді бірде жол көлік оқиғаларынан туындаған авариялық жағдайда жедел көмек көрсетіп, өрт кезінде де халықты тілсіз жаудың арасынан алып шығатын құтқарушылар. Ауа райының қолайсыздығына қарамастан жылдың төрт мезгілінде де көмек көрсетуге тырысатын құтқарушыларға қойылар талап та жоғары. Яғни қыстың аязды күндері көз аштырмас боранға қарамастан, тілсіз жаумен күресіп, айдалада қар құрсауында қалып кеткен халықты құтқаруға тырысса, көктемгі сел кезінде басқалар сел аймағын тастап қашып жатқанда мал-жанды құқтқаруға тырысып апат аймағына ұмтылатындар да құтқарушылар. Ал тілсіз жауға қарсы тұра білу үшін физикалық дайындық өте маңызды.

Таудағы төтенше жағдай кезінде құтқарушылардың маңызы зор!

 Осы орайда айта кетер жайт, тау басына өрмелеушілердің тауға деген ықыласы ерекше. Олар кей жағдайларда тиісті орындардың ескертуіне де қарамастан тауға шығуға асығады. Ал аяқ асты күн райы бұзылатындай жағдай туындаса тау басының екі есе қауіпті екені айтпаса да түсінікті. Жалпы қарапайым қауіпсіздік қағидаларын сақтау туристердің, тауға өрмелеушілердің өмірін құтқаратынын ұмытпауымыз керек. Осы орайда атап өтер жайт, тауға шығушылар ең алдымен, жабдыққа, құрал-саймандарға, киім мен аяқ киімге, тау айналасындағы байланысқа назар аудару керек. Тауға жорық жасаған кезде өз бағдарыңызды міндетті түрде тіркеу, нақты тауға шығатын жолды  білу, тәжірибелі жолсеріктердің қызметін пайдалану қажет. Бұл қағидалар тауға сәтті көтерілудің кепілі. Мұндай қауіпсіздік ережелерінің сақталуы таудағы жазатайым оқиғалардың алдын алады. Тауға шығушылар өз өмірлеріне қоса құтқарушылардың да қауіпсіздігін естен шығармауы қажет. Кейбір жағдайда тау басындағы адамдарға көмек керек болса да, таудағы қалыптасқан жағдайдың қолайсыздығына орай құтқарушылар әрекет ете алмайтын, құтқарушылар өз көмегін көрсете алмайтын жағдайлар туындайды. Сондай жағдайдың алдын алу үшін адамдар қауіпсіздік ережелеріне бағынуы керек. 

Құтқарушылар суда аса абай болуды ескертеді

Айта кетер жайт, адамдар өз күштерін жете бағаламай, көп жағдайда төтенше жағдайға өздері себеп болып жатады. Мәселен суға шомылуға арналмаған,  жабдықталмаған орындарда суға батады. Әрбір адам суға шомылатын су айдынының қауіпті орындары мен ерекшеліктерін білуі тиіс, өйткені жабдықталмаған жерлерде үйінділер, суға батырылған бөренелер, темір кесектері, шыны және басқа да заттар болуы мүмкін. Жақын келе жатқан катерлерге, кемелерге және моторлы қайықтарға қарсы жүзу өте қауіпті, себебі жүзу құралдарының түбіне жақын жүзіп бара жатқан адамның өміріне қауіп төнуі мүмкін. Жазғы демалыс кезінде балалардың да қауіпсіздігі маңызды. Су айдындарына, арықтар мен каналдарға жақын тұратын ата-аналардың жауапкершілігі жоғары болуы керек. Статистиканы сөйлетер болсақ, шомылу кезеңінің басынан бастап өз күштерін бағаламау себептері бойынша, суға шомылу кезінде алкогольдік мас күйінде, суға батушыны құтқару және балаларды ересектердің қарауынсыз қалдыру кезінде 159 адам, оның ішінде 47 бала суға кетіп, көз жұмған. Салыстырмалы түрде айтар болсақ былтырғы жылы осы уақытта 204 суға кету оқиғасы орын алса, 70 бала суға кетіп көз жұмған. Яғни карантиндік жағдай көптеген жанның қауіпсіздік сақтауына сеп болып тұр деуге болады. Егер үнемі халық қауіпсіздік жағдайына мұқият болса, төтенше жағдай қызметіне, құтқарушыларға түсетін қоңырау саны азаяр еді. 

Құтқарушылар үнемі сақадай сай жүреді
Құтқарушылар түрлі жағдайларға тап болатындықтан үнемі бабында жүріп қана қоймай, физикалық дене жаттығуларын да шыңдап отырады. Үнемі оқу жаттығу жұмыстарын өткізіп, олардың талапқа сай екендігі де тексеріледі. Төтенше жағдайларды жою бойынша бірлескен іс-қимылдарын пысықтау бойынша өрт-құтқару тактикалық сабақтары өткізіледі. Оқу-жаттығу төтенше жағдайларды жою кезіндегі іс-қимылдарға дайындықты жетілдіру үшін өткізілетінін ескерсек, құтқарушылардың физикалық мүмкіндігі бақылауда екенін аңғарамыз. Құтқару авиациясының ұшу экипаждары мен құтқарушылардың осындай жаттығулары тұрақты негізде өтеді, олар қиын жағдайларда құтқару жұмыстарын жүргізу қажет болған жағдайда жаттығады. Айта кетейік, ұшу экипаждары мен құтқарушылар тікұшақтан парашютсіз десанттаудың әртүрлі әдістерін қолданады, оларды таулы жерлерде зардап шеккендерді іздеу кезінде су тасқыны аймағынан іздестіру-құтқару жұмыстарын жүргізу кезінде бірнеше рет қолдануға тура келді. Сондықтан құтқарушыларға үнемі тыныштық жоқ. Халықтың қауіпсіздігін бақылап, төтенше жағдайлардан құтқарып отыратын қанатсыз періштелердің жұмысы құрметке лайық!

Қуаныш ЕРМЕКОВА
 




Көрілген: 853    Пікірлер: 0

жұма, 28.08.2020, 01:19

Достарыңмен бөліс:

  • СОҢҒЫ ЖАРИЯЛАНЫМДАР:

    Көп ашылған Көп пікір жазылған
    2020
    2008
    2009
    2010
    2011
    2012
    2013
    2014
    2015
    2016
    2017
    2018
    2019
    2020
    желтоқсан
    қаңтар
    ақпан
    наурыз
    сәуір
    мамыр
    маусым
    шілде
    тамыз
    қыркүйек
    қазан
    қараша
    желтоқсан

    Алаш Айнасы мұрағаты

    Дс Сс Ср Бс Жм Сн Жс
    1 2 3 4 5 6
    7 8 9 10 11 12 13
    14 15 16 17 18 19 20
    21 22 23 24 25 26 27
    28 29 30 31