Алматыда 8 жүргізуші 9 млн теңгеге жол ережесін бұзған

10 тамыз 2022, 15:58

“Қорғау – Қауіпті жүргізуші” жүйесі 9 млн теңгеге жуық қаржыға жол қозғалысы ережесін бұзған 8 жүргізушіні анықтады, - деп хабарлайды Alashainasy.kz тілшісі Polisia.kz-ке сілтеме жасап.

Бұрын хабарланғандай, Алматы полициясының алдыңғы шептегі бөлімшелері жол қауіпсіздігін қамтамасыз ету мақсатында алдын алу іс-шараларын жүргізуде.

 

Көлік құралдарына жалған мемлекеттік тіркеу нөмірлік белгілерін орнатқан, сондай-ақ жол қозғалысы ережелерін жүйелі түрде бұзып, айыппұл төлеуден жалтарып жүрген көліктерді анықтауға ерекше назар аударылуда.

 

Жалған нөмірлік белгі таққан және көлік құралын басқару құқығынан айырылған, сондай-ақ жол қозғалысы ережелерін жүйелі түрде бұзып, ірі көлемде қарызы бар көліктердің тізімдері жасақталды.

 

Сонымен қатар, полицейлер құқық бұзушылықты анықтаудың электрондық жүйесі “Сергек” пен “Қорғау – қауіпті жүргізуші” қосымшасы арқылы жол қозғалысы жағдайын бақылауда.

 

Тек осы айдың басынан бері жол қауіпсіздігі саласында 4 342 құқық бұзушылық анықталды және көлікті мас күйінде басқарған 44 жүргізуші ұсталды.

 

 

 

Автоматтандырылған ақпараттық бақылау жүйесінің көмегімен 716 автокөлік анықталды және ұсталды, оның 46-сы жалған тіркеу нөмірімен, 220-сы сақтандыру полисінсіз, 397-сі техникалық бақылаудан өтпеген, 47-сі мемлекеттік нөмірсіз.

 

Сонымен қатар, бұрын сот шешімімен көлік құралдарын басқару құқығынан айырылған 7 жүргізуші ұсталды.

 

 

 

Тәртіп бұзушылар әкімшілік жауапкершілікке тартылып, 62 автокөлік мамандандырылған тұраққа орналастырылды.

 

Сондай-ақ, жол ережесін жүйелі түрде бұзып, айыппұл төлеуден жалтарып жүрген жүргізушілерді анықтау жұмыстары да жүргізілуде.

 

Ай басынан бері 9 млн теңгеге жуық айыппұлмен ЖҚЕ бұзған 8 жүргізуші ұсталды. Олардың көліктері айыппұл тұрағына қойылды.