Инсульттен аман қалған адам
Таяуда біз бір ерекше кісімен танысып, сұхбаттас болдық. «Ерекше» деп отырғанымыз – ол осыдан екі жыл бұрын инсульт алған жан екен, содан құлантаза дерлік айығып кетіпті. Басынан өткен жайлар туралы айтқанда таңқалдық. Сосын жұртқа мұның да бір пайдасы тие жатар деп газетке жазуды шештік.
Қарағай бүрінің тұнбасын ішіп жүр екен
Әбекең бұрын көлік жүргізушісі болып еңбек еткен екен. (Белгілі себептермен ол кісі өзінің шын аты-жөнін атамауымызды сұрады). Ол инсультке ұшырағанға дейін ешқашан ауырмаған, дәрігерлерге көрінбеген. Жасы қазір 62-дегі азамат өзінің қан қысымының жоғары екенін, яғни оның кейде 180-200-ге, 220-ға дейін көтеріліп кететінін бертінде ғана біліпті. «Жұрттікі сияқты басым ауырып мазамды алмағасын оны тіпті сезінбеген де екенмін. «Давлением» барын кейін білдім. «Сақ жүр, күн астында көп жүрме» деп айтқандар болған, бірақ қан қысымы мазамды алмағасын оған аса мән бермейтін едім.
Осыдан екі жыл бұрын кенеттен қан қысымым көтеріліп, естен танып құлап, ауруханаға түстім. Ақыл-есім бүтін, кімдердің келіп-кетіп жатқанын білемін, бірақ денемнің оң жағы түгел салданып қалды, сөйлей алмаймын, бірдеңе айтайын десем, кекештене уілдеген дыбыстың өзін әзер шығарамын, сол кезде көзім аларып, бетім қисайып кетеді екен. Ауруханадағылар бұдан енді айықпайды деп мені он күннен кейін үйге шығарды. Тәртібі бойынша емі арада он күн үзіліс жасап барып жалғастырылады екен. Туыстарым көтеріп, сүйемелдеп әкеліп төсекке жатқызды. Бәрін сеземін-білемін, бірақ өздігімнен жүріп-тұра алмаймын, қажетімді айтайын десем, тіл жоқ. Сөйтіп кеше ғана өз аяғыммен жүрген адам көрер көзге мүгедекке айналып, кәріп болып қалдым», – дейді Әбекең.
Бұл кісіге тиісті медициналық жәрдеммен қоса өзінің өмірге деген құштарлығы, ойламаған жерден алып ұрған аурудан қалайда айығамын деген сенім, жақындары мен жақсы адамдардың жанашырлығы көп жәрдемін тигізген екен. Әбекең бүгінде өзінің барам деген жеріне еш уайымдамай, ешкімді әуре етпей, өзі барып-келіп жүре беретінін айтады. Қандай да бір жайсыздықтың алдын-алу мақсатында күнделікті қарағай бүршігінен (сосновые шишки) дайындалған тұнбадан ішіп алады екен.
«Оны кез келген адам өз үйінде дайындап алуына болады. Кәдімгі қарағай бүршігін банкіге толғанынша саласыз да, үстінен арақ құйып, 20 күннен 1 айға дейін қараңғы жерде тұндырып қоясыз. Дайын болған соң одан күнделікті аз-аздан ішіп жүру керек. Бас сығымдап қысып ауырғанда, қан қысымы көтерілгенде ішсеңіз, жарты сағаттай уақытта жайсыздықтың бәрі сап тыйылады, маңдайдан тер шығады, жеңілдеп, рахаттанып қаласыз. Мен оны инсульттен айыққалы бері жүйелі түрде ішіп жүрмін», – дейді ол кісі.
Бақытжан деген массажшыға, Жексен есімді азаматқа алғыс айтады
Осы орайда Әбекең өзіне жәрдемі тиген Бақытжан есімді массажшы жігіт пен танысқандарына көп бола да қоймаған Жексен есімді азаматқа аса риза екенін білдірді.
«Бақытжан өте білікті массажшы екен, денемнің салданып қалған тұстарына, жалпы денеге арнайы массаж жасап, жан бітіруге тырысты. Өзінің бұл салада тәжірибесі бар азамат екен, менің үмітімді оятып: «Аға, еш уайымдамаңыз, емді дұрыс қабылдай беріңіз, бұдан айығып кетуге мүмкіндігіңіз бар», – деп айтты. Сөйтіп ол маған сенім берді.
Жексен деген азаматпен танысқанымызға да көп болмаған еді, өзі бір мың болғыр жан екен. Таныстардан менің жағдайымды ести салып артымнан ауруханаға іздеп келді. Қарағай бүрінен жасалған тұнба мұндай дерттен емделуде шипалы екенін түсіндіріп айтты, сенбесеңіз, интернеттен қарап көруіңізге болады деді. Содан бері осындай тұнбаны үйдегілер істеп қояды, мен оны тұрақты ішіп жүруді әдетке айналдырдым. Жалпы, қарағай бүрінен алынған тұнбаны қан қысымы мазалайтын адамдардың барлығы да ішіп тұрса болады. Ол мидағы қан айналымын жақсартады, тамырды тазартады екен. Бұл жөнінде интернетте көп жазылған.
Дәрігер тағайындаған мықты «уколдың», массаж бен қарағай тұнбасының арқасында арада төрт айдай уақыт өткесін оң қолыма жан кірді, тағы бір төрт айдан соң аяқ жанданды, біреудің демеуімен жүре алатын болдым. Тіпті де сөйлей алмайтын едім, бір жылдай уақыттан соң еш тұтықпай, еркін сөйлей алатын деңгейге де жеттім. «Құдай дерт берді, дертінің шипасын да берді» деп жатады ғой, айтарым сол – Алла өзі дерт берді, оның шипасын да берді, әуелі Алла, сосын мықты «уколдар» мен осындай абзал азаматтардың көмегі, қарағай бүрі тұнбасының арқасында бетім бері қарады», – дейді Әбекең.
Бір дәрігерге қарғыс айтқысы келіп жүр
Ойда-жоқта осындай қатерге ұрынып, бірақ жақсы адамдардың жәрдемі арқасында инсульттен аман қалған Әбекең осылай дейді. Ол кісінің өзіне алғашқы медициналық жәрдем көрсеткен дәрігерлерге, массажшы жігітке, қиын жағдайға ұшырағанын ести сала артынан іздеп барып, қарағай бүршігінен жасалған дәрмектің ем болатынын түсіндірген Жексен есімді азаматқа айтар алғысы көп. Алайда ол кісінің кеудесінде «ақ халатты абзал жан» атанып жүрген бір дәрігерге деген дық қалыпты.
«Инсульт алғанымды, төсекке таңылып жатқанымды көрген дәрігерлер, қолымда оны растайтын тиісті қағаздарым бар, – дейді Әбекең. – Бірақ мен бұған бір дәрігерді сендіре алмай-ақ қойдым. Арнайы комиссиядан өтейін десем, жолдама бермейді. Мені пайдакүнемдікпен мүгедектікке шығып алғысы келіп жүрген адамдай көреді-ау деймін. Бәрібір сенбейді. «Сіз инсульт болған адамға ұқсамайсыз. Әдемі боп тұрып кеткенсіз ғой», – дейді. Алғашында маған оңалту орталығына, тіпті демалыс үйіне жіберетіндері жайлы да айтқан еді, кейін оның бәрі жайына қалды. Қазір алдарына бармаймын да.
Әлгі оқиғадан кейін де бір мәрте қан қысымы 200-ге дейін көтеріліп, екінші мәрте инсульт алғанмын. «Жедел жәрдеммен» ауруханаға жеткізіп, тиісті көмек көрсеткен. Енді арнайы комиссиядан өткім келеді. Ал ауруханадағылардың айтуынша, олардың тексеруіне жету үшін міндетті медициналық сақтандыру қорына кейінгі 1,5 жылға ақша аударуым керек екен. Ол 35 мың, 45 мың теңгедей болатын көрінеді. Осы сомадағы ақшаны құйсам ғана жолдама бермек, әйтпесе қабылдамайды дейді. Мен инсульт алып құлағанда міндетті медициналық сақтандыру деген жоқ еді, енді бәрі де ақылы болып кетіпті. Сонымен комиссияның тексеруінен өту үшін оған жолдама ала алмай жүрмін. Осыған ренжіп, әлгі дәрігерге үстіңнен шағымданамын десем, ол қайда барсаң онда бар, бәрібір менің алдыма қайтып келесің дейді. Ол кезде әйелімнің сүйемелдеуімен әзер жүретін едім, соны көріп тұрып осылай деді. Ешкімге жаны ашымайтын ондай бетпақ адаммен салғыласу үшін де күш керек, сонымен қазір не істерімді білмей жүрмін. Маған жол-жобаны түсіндіретін адам болса, мұндайда не істеу керегін айтса дұрыс болар еді. Ал әлгіндей дәрігерлерді медицина саласына жолатпау керек қой, ондайлар көп адамның обалына қалып жатыр. Мен ғой, аяғымнан тұрып кеттім, ал инсульттен соң жүріп-тұруы, сөйлеуі мұң болып жатқандар қаншама? Қатты нала болғаным сонша, әлгіге: «Сен де мен сияқты «ауырмаған» бол. Егер мен инсульт алған болсам, оны сен де ал, мен ауырмаған болсам, сен де ауырма. Менің көргенімді көр», – дегім келеді».
Әбекең осылай дейді. Ол кісі өз басынан өткеріп, азабын көргеннен кейін инсульт алды деген адамды естісе болды, оған барып, өзіне массаж жасаған азаматтың байланыс телефонын береді екен. Оған қоса қарағай бүршігінің пайдасы, одан тұнбаны қалай жасау, тұнбаны қалай, қандай мөлшерде ішіп тұруы керегі жөнінде айтады. «Қазірдің өзінде сондай 15 шақты адамды көрдім-ау деймін. Менікі жәрдемім тисе екен деген ниет қой. Ал қарағай бүршігін бұл ағаш өсетін жердің бәрінен табуға болады. Оны арнайы жинайтын адамдардың 150-200 теңгеден сатып жүргенін бірнеше мәрте көрдім. Дегенмен мұны біздің Оңтүстік жақта әлі де көп адам біле бермейді», – дейді ол кісі.
Қарағайдың бүршігі шынымен дертке дауа ма?
Міне, біз Әбекеңнен осындай жайлар жөнінде естідік. Адамға жанашырлықпен қарап, жәрдемін аямайтын қамқор азаматтар жайында, сондай-ақ адамның реніш-наласынан, қарғыстан қорықпайтын дәрігер жөнінде білдік. Әркім ісінің нәтижесін өзінің амалына қарай көре жатар, ал біз оқырманға Әбекең айтқан қарағай бүршігі туралы интернеттен оқығандарымыздан айта кетуді жөн көрдік. Қысқаша айтқанда, онда былай деп жазылыпты:
«Қарағай бүршігі жүйке жасушаларының бүлінуін тұйықтайды, оның құрамындағы заттардың денсаулыққа пайдасы көп. Ол иммундық жүйені нығайтады, ағзаны патогендік заттардан тазартады, оны қабынудан қорғайды, қанды сұйылтады, оны оттегімен қанықтырады. Қарағай бүршігіндегі заттар ми жасушаларына пайдалы, жүйке жүйесін тыныштандырады, нығайтады, ұлпалардың қалпына келуін жылдамдатады, қан тамыры қабырғаларын тазартады, холестерин қақтарын жояды, мидағы қан айналымын реттейді, эритроциттердің иілгіштігін қалпына келтіреді, олардың бір біріне жабысып қалуын болдырмайды, жүрек жұмысына жағымды әсер етеді. Ол тыныс жолдарына да жағымды әсер етеді, варикозға, тромбозға, гастритке, асқазан жарасына, буын ауруларына қарсы шипалық қасиеті бар.
Қарағай бүрінен жасалған дәрмектерді 12 жасқа дейінгі балаларға, 75 жастан асқан қарттарға, жүкті және бала емізетін әйелдерге, бүйрек және бауыр жетіспеушілігінен зардап шегетіндерге қолдануға болмайды».
…Жалпы, интернетте бұған қатысты айтылған жайлар жеткілікті екен. Ендеше бұл жөнінде де біле жүргеннің зияны бола қоймас. Дегенмен адам ағзасы әртүрлі, оның физикалық күйі де әрқалай болып келетіні белгілі. Сондықтан ем болады екен деп бас салып қолдануға кірісіп кетпей, қарағай бүршігін пайдалану жағын алдымен өз дәрігеріңізбен кеңесіп алғаныңыз, оның қадағалауында жүргеніңіз абзал болмақ.
Д. НҰРПЕЙІС.
