"КҮЛГЕН СИЯҚТЫ БОЛЫП ЕДІ..."

20 желтоқсан 2021, 14:20

Ертеде ғой. Бір ағамыз түстіктен (обед - Б.Б) өте көңілді шығыпты. Әлгінде ғана сұлулар туралы айтылған әңгімелер есінен шығар емес. Оның үстіне басып-басып жіберген коньягі құрғыр да бойды алып барады. Кенет... есіне жұмыстағы бір келіншек түсті. Хаса сұлудың өзі. Екі көзі боталай қарағанда, жүрегің аузыңнан шығып кете жаздайды. Амандасқан сәттегі жымиысы қандай әдемі. Дәл сол кезде оң жақ бетінде ойыла қалатын шұңқыры ше. Жүрегі қатты-қатты соғып кетті.
...Ойпырмай, жұмысқа жеткенде әлгі келіншектің алдынан шыға келмесі бар ма? Әдеттегідей жымия амандасты. Сөйтті де, кабинетіне кіріп кетті. Жан-жағына қарап еді, ешкім жоқ. "Қой, болмас. Тәуекел!". Кіріп барды. Әнтек шошына қараған сұлудың қарсылығына қарамай құшақтай алды. Ерні де ақ тамаққа қадала берген. "Вы что". Қатты бұлқынған келіншек бұны көкірегінен итеріп жіберіп, сыртқа ұмтылды...
...Ар жағы көрген түстей. Бұндай тағылықты көрмеген орыс тілді келіншек бірден бастыққа барыпты. Ол "жұмысқа ішіп келгенімен қоймай, сұлу әйелді "изнасиловать" етіп жібере жаздаған" бұны жұмыстан шығару туралы бұйрыққа қол қояды. Әйтеуір, дер кезінде бір кісілер араласып, бұйрықты бұзғызып, әупірімдеп, аман қалады...
Кейін құрдастары ортаға алып: "Жазған-ау, жасың алпысқа келгенде, бұның не? Оның үстіне дәл пәленшеге ұмтылғаның қалай? Мынауың аспандағы айға қол созғандай әрекет қой..." демей ме? Сонда әлгі ағамыз бір күрсініп алып:
- Қайдан білейін, күлген сияқты болып еді, - дейтін көрінеді.
...Кеше демалыста бір ағамызбен кездестім. Әдеттегідей жоспары көп екен. "Өйтемін...", "Бүйтемін...". Көбі бос сөз екені, жүзеге аспайтыны әлден-ақ көрініп тұр. Айтып көріп ем, ағамыз қайтатын емес. Не деген энергия?! Тек босқа жұмсалатыны өкінішті.
...Әй, өмір-ай, күлген сияқты боп тұрасың-ау.
#қазақыәңгімелер

facebook.com